Lefatsheng lena ke tla tloha

1. Lefatsheng lena ke tla tloha, Malwetse a ka a tla fela; Ke khathetse, ke batla phomolo. Eto la ka ke se ke tla le qeta, Ke orohele sefubeng sa Ntate.

2. Meleko e se e tla ntesa, Mefokolo e tla ntlohela, Ke lese ho sitelwa Modimo; Ke hlahlelwe lesakeng la Konyana, Moo ke sa e'o bona dihloriso.

3. Sedi la teng le tla nkhanyetsa, Tsebo ya teng e tla nkhodisa, Ha ke sa tla phela ka bowatla; Rato la teng le sa tla 'nyakalatsa, Ka matsatsi a se nang ho fela.

4. Monghadi, ke o lebeletse, Nkuke, etswe o lokisitse, Ruri, Jesu, ke o hlolohetswe, U nkuke, ke ee ke o sebeletse, Mong'a ka, o se o ntiehetse.